នាយសង្កាត់រដ្ឋបាលព្រៃឈើស្នួលលោក ឡាយ ធុជ ឃុបឃិតជាមួយឈ្មួញឈើ
28-July-2016 | ដោយ មែន កំសត់
សកម្មជនព្រៃឈើនៅស្រុកស្នួល ខេត្តក្រចេះ បានរាយការណ៍មកថា បទល្មើសព្រៃឈើនៅក្នុងខេត្តក្រចេះបានបន្តកើតឡើងវិញជាច្រើនករណី ហើយក៏គ្មានមន្ត្រីជំនាញណាចេញមុខទប់ស្កាត់ឡើយ។ ប្រភពដដែលបានបញ្ជាក់ថា បទល្មើសព្រៃឈើអាចកើតឡើងបានរលូនដោយសារតែមន្ត្រីជំនាញមួយចំនួនបាន ឃុបឃិតជាមួយឈ្មួញឈើដើម្បីទទួលផលប្រយោជន៍ផ្ទាល់ខ្លួន និងបក្ខពួកដែលបញ្ហានេះកំពុងបង្កភាពក្តៅក្រហាយដល់ប្រជាពលរដ្ឋ ខេត្តក្រចេះ។
ប្រជាពលរដ្ឋស្រុកស្នួលបានបង្ហើបថា ឈ្មួញឈើភាគច្រើនធ្វើសកម្មភាពនៅពេលយប់ដោយដឹកឈើឆ្លងកាត់ខេត្តក្រចេះ តាមក្បួនរថយន្តជាខ្មែរ ពិសេសលើផ្លូវជាតិលេខ៧ដែលមានការជួយបិទបាំងពីមន្ត្រីជំនាញ និងសមត្ថកិច្ចនៅក្នុងខេត្តក្រចេះ។ នាយសង្កាត់រដ្ឋបាលព្រៃឈើស្នួលលោក ឡាយ ធុជ ត្រូវប្រជាពលរដ្ឋរិះគន់ថាបានឃុបឃិតជាមួយឈ្មួញឈើ ហើយថែមទាំងព្រមានអ្នកសារព័ត៌មានមិនឲ្យចុះផ្សាយពីរឿងអាស្រូវ របស់ខ្លួន និងបក្ខពួកទៀតផង។
មិនត្រឹមតែនាយសង្កាត់រដ្ឋបាលព្រៃឈើស្នួលលោក ឡាយ ធុជ ម្នាក់នោះទេដែលជាប់ពាក់ព័ន្ធជាមួយបទល្មើសព្រៃឈើនៅក្នុងខេត្តក្រចេះ មានសមត្ថកិច្ចជំនាញមួយចំនួនទៀតផងដែរដែលបានឃុបឃិតជាមួយឈ្មួញឈើ។ ប្រភពដដែលបានបញ្ជាក់ថា មន្ត្រីកងរាជអាវុត្ថហត្ថ និងនគរបាលសេដ្ឋកិច្ច ក៏បានជាប់ពាក់ព័ន្ធជាមួយបទល្មើសព្រៃឈើផងដែរ ដូចនេះបានជាបទល្មើសព្រៃឈើនៅតែអាចកើតមាន បើទោះជាមន្ត្រីរដ្ឋាភិបាលព្រមានចាត់វិធានការទប់ស្កាត់យ៉ាងណាក៏ដោយ។
ជុំវិញបញ្ហាខាងលើនេះ ប្រជាពលរដ្ឋស្រុកស្នួលបានរិះគន់ថា បើរដ្ឋាភិបាលបានត្រឹមតែចាត់វិធានការក្តៅទប់ស្កាត់បទល្មើសព្រៃឈើ មួយរយៈហើយ ក៏មានការធូររលុងទៅវិញ នោះបទល្មើសព្រៃឈើនឹងនៅតែកើតមានដដែលមិនខានឡើយ។ ប្រភពដដែលបានបញ្ជាក់ថា បើរដ្ឋាភិបាលមិនហ៊ានចាត់វិធានការច្បាប់លើមន្ត្រីពុករលួយ នោះបទល្មើសព្រៃឈើនឹងនៅតែកើតមានមិនខាន ព្រោះមន្ត្រីពុករលួយបន្តមានសេរីភាពប្រព្រឹត្តអំពើល្មើសច្បាប់ដោយ គ្មានទោសពៃ៕
ចំនួនអ្នកទស្សនា
- ថ្ងៃនេះ2811
- ម្សិលមិញ4901
- សប្តាហ៍នេះ21121
- ខែនេះ175331
- ឆ្នាំនេះ777511
- សរុប21219967